User Profile

Liburutegian liburua ikusi eta atentzioa deitu zidan. Etxean eginiko garbiketa produktuak, kontserbak, edariak... proposatzen ditu liburuak. Hala, aukera bat ematea erabaki nuen, nik ere interesa baitaukat horrelako gai batzuetan.

Liburuak urtaroka antolatzen ditu egin ditzakegun gauzak, hainbat esparru jorratuz (etxea goxatzekoak, sukaldean egitekoak, garbigarriak...). Adibidez, udaberrian, etxea goxatzeko zakutxo naturalak egitea gomendatzen du, eta horiek egiteko argibideak eman.

Orokorrean, itxura ona zuen, baina pare bat errezetetara heltzean (olio pikantea, eta piper morroiak oliotan) irakurri ahal izan nuen bertan gomendatzen ziren kontserbetarako argibideak ez zirela seguruak osasun aldetik. Zergatik? Baratxuria oliotan sartzeak epe luzerako, hozkailuan ez badago edota tratamendu termiko oso beroa ez bazaio aplikatzen, ez da segurua eta botulismoa garatu dezake (ez, maria bainuan esterilizatzea ez da nahikoa). Ez dakit, gainontzeko kasuen kasuan, errezetak seguruak diren edo ez. Beste kasu bat aipatzearren, kontserbek pH azidoa izatearen garrantzia aipatzen du liburuak, baina ez du esaten ez nola neurtu, ezta nola lor daitekeen azidotasun hori kontserba seguruak egiteko.

Beraz, hori ikusita, ba ezin dut liburua gomendatu. Egia da botulismoa sortu eta garatzeko probabilitatea oso txikia dela, baina arriskuak ez du merezi. Eta aditu batek idatzitako liburu batean ezin dira gisa honetako praktikak gomendatu. Liburuan egon daitezkeen beste alternatiba eta errezeten zuzentasuna ezbaian jartzen du honek (nahiz eta liburuan gauza interesgarriak egon badauden).

Alternatibak bilatu edota erabiltzeak ez luke suposatu beharko elikadura praktika ez-seguruak erabiltzea.