Erabiltzailearen profila

Urnietako saroeei buruzko informazio ugari jasotzen du egileak: arkeologia, hizkuntzalaritza, dokumentazio historikoa... Hala ere, faltan bota dut arkeoastronomiarekin lotura justifikatzea. Saroeak eraikitzean agian printzipio astronomikoak erabili zituztela dio egileak: "maiz benetako 'haizeen arrosa' bihurtzen baitira" eta "sarritan astronomikoki primeran zuzendua egon ohi den oktogonoa" bezalako baieztapenak eginez, baina gero ez ditu ematen hori justifikatzeko datuak. Gainerakoan irakurketa interesgarria horrelako gaiak gustuko dituenarentzat.

Baserri ondoan utzita zegoen sail bat fruta arboladi bihurtzen ari naizenez oso interesgarria iruditu zait eta aurrerantzean ere eskura izango dut erreferentzia bezala. Baso jangarrien inguruko gai asko ukitzen dituenez ez du gehiegi sakontzen bakoitzean. Hala ere, bibliografia hautatua dakar gehiago ikasi nahi duenarentzat. Naturako basoetatik eta basoaren mugetako sailetatik ikasteko gonbita egiten du eta oso urrun dago jardinetatik. Argazkietako belar luzea ikusi besterik ez dago.

@gorka_bm​ren iruzkina irakurri ondoren irakurri nahi ditudanen zerrendara zuzenean paperjale.eus/user/gorka_bm/review/24300/s/astroen-gurutzaketa#anchor-24300

#MaitasunKapitala​ren hasierako orriak astunak egin zitzaizkidan, Martin eta Olga oso pertsonaia gogaikarriak iruditu zitzaizkidalako. Liburua uztekotan ere egon nintzen. Hala ere, aurrera jarraitu nuen, eta orriak pasa ahala gero eta interesgarriagoa iruditu zait liburua: maitasunaren, maiteminaren eta eragiten duten minaren inguruko gogoetak, intriga puntua duten argumentuaren jira-birak...

Hau ere lagun batek gomendatuta hasi dut. Neguan hostoa galtzen duten zuhaitzak landatzeko garaian gaudenez, eta baserri ondoko sagasti-fruta-arboladia berreskuratzen ari naizenez, irakurketa egokia dirudi!

Niretzat behintzat ezezagunak ziren Frantziako Iraultzak, eta ondorengo Konbentzio gerrak Euskal Herrian izan zituzten eragin lazgarriak. Euskarazko Wikipedian liburua irakurtzen adina denbora, edo gehiago, pasa dut. Komikiaren haritik tiraka esplizituki aipatzen ez direnak ere aurkitu ditut, adibidez Gipuzkoako Errepublikarena. Gomendagarria, baina pertsonaietan gehiago sakondu izana eskertuko nuke.

Bada denbora gomendatu zidatela eta azkenean gaur hasiko naiz komiki honekin. Ea zer moduz!