Kritikak eta Iruzkinak

Espektatibak ez dira bete: bere iritzia beti kontuan izaten dudan lagun batek gomendatu zidan, baina ez nau txunditu. Liburua erraz irakurtzen da, eta argi ikusten ditut bere indarguneak: kapitulu motzak, erritmo bizia, bi plano, ezusteko bideak... Psikiatriko batean girotua, osasun mentalaz eta bere ingurumariaz pentsatzeko abagune ona da: psikoterapiaz, zentroetako jardunbideez...

Hala ere, gaiak eman zezakeena kontuan hartuta, sinplea begitandu zait, eta argumentuaren une batzuetan eskas samarra: protagonistetako bat psikoterapeuta da, eta bere ahotan ematen diren iritzi batzuk arinegiak iruditu zaizkit, eta argumentuan ere elementu batzuk sinesgaitz eta behartuak (Aliciaren egunerokoak ez du egunerokoa ematen tarteka, sei urtez "kartzela" hartan ezkutuan gorde ahal izatea sinestezina, margolari profesional bati margotzeko aukera ematea bururatu ez izana...).

Hainbat testu jasotzen ditu liburuak, jolasa nagusi, hizkuntza, esanahi eta testu generoan. Irudi batzuk errepikatu eta testua zipriztindu arren, zer pentsatuta ematen duten gai, egoera eta hausnarketak biltzen ditu. Absurdoa, umorea, kritika... Don Inorrez taldearekin prestatutako zuzenekoa ikusteko gogoz.

Euskal literatura klasikoari buruzko diskurtso nagusia zabaldu eta bazterrean gelditu izan direnak (ere) ezagutarazteko lan ederra da. Izan ere, inprimatutako testu nagusietatik kanpokokoak aintzat hartzen ditu eta, jakina, gutxietsi izan diren emakumeen lanak ere bai. Horretaz gain, antologia ere bada, eta garai desberdinetan gizon eta emakumeek generoaz zer dioten ere biltzrn du eta hausnarketa gai bihurtu. Hitzostean Iratxe Retolazak dioen moduan, abiapuntua edo hezurdura jarri du hurrengo ikerketa eta osteko dibulgazio lanetarako.

Gustura irakurri dut, inoiz kontzepturen/erreferentziaren bat guztiz ulertu ez arren.

Bi plano ditu: narratzailea den "bizkartzain" umoretsua alde batetik, eta pentsalaria(k) edo diskurtso egituratua bestetik. Narratzaileak rollaren arabera, bere idoloaren bizkartzain/elkarrizketatzaile edo lekuko, testua dentsoagoa edo arinagoa da. Baina bi tonu desberdin izan arren, bietan dago gizarte salaketa. Zenbat azpimarra! Hausnarketarako ideia asko ematen ditu, eta narratzailearen tonu ironikoak arintasuna ematen dio eta barre txikia atera han-hemenka. Geure buruari barre egin ezean akabo!

Hiru eguneko kronikak biltzen dituen Davisen hitzaldi, elkarrizketa (galdera zein erantzunak) edo hausnarketa batzuk bere pentsamoldea batzeko txatal mamitsuak dira.

Ez da ohiko nobela beltza, ez da hilketa bat argitu nahian abiatzen, baina pertsona baten bila dabilen protagonista bat dugu, polizia edo ikertzailea izan barik, arrastoa arrasto, horretan buru-belarri sartzen den gizon bat, obsesionatu egin delako behin ikusitako neska batekin. Bestetik, beste protagonista, jatorri pobrea atzean utzi nahi duen femme fatal ederra. Kapituluetan narratzailea txandaka agertzen zaigu eta gertaera baten aurrean ikuspuntu desberdinak daudela konturatzen gara. Ikusi nahi duguna baino ez dugu ikusten. Emakume diru-gode eta manipulatzailea ezagutu barik ametsetako aingerua da.

Sara Mesaren beste pare bat liburu (Un amor, La familia) irakurrita nituen, eta berriro pentsatu dut: ze ona! Zelako kontamoldea, zelako planteamendua, zelako gizarte kritika... Annie Ernaux-ek idazketa labana bat dela dio, ez dakit Mesak zer dioen, baina geure buruari galderak egiteko eta arau batzuk zalantzan jartzeko abilezia du, duda barik...

Poesia Mailu bat da esaten zuen Arestik, eta Ernaux-k labana bat dela dio. Gure komunitatean eragiteko modu bat, bizitzatik banaezina, jarrera (konprometitu) bat.

Ibilbide luze eta oparo baten atzean idazketari buruzko ezagutza, formazio, dedikazio zein eskarmentua nabarmentzen dira. Literatura hitza albo batera uztearen arrazoitik hasi, eta bere hautuak, egiteko moduak eta ikuspuntuak azaltzen ditu; izan ere, bere idazketari buruzko gogoeta bildu nahi du elkarrizketak: eraginak, estiloa, sailkapenak, abiapuntuak, prozedurak...

Nobel Saria eman zioteneko hitzaldiak emozionatu ninduen, eta liburu honetako muina han dagoela kondentsatuta iruditzen zait. 20 urte lehenago email bidezko elkarrizketa den liburu honetan ere hortxe daude bere printzipioak, bere idazketatik bereizi ezin direlako.

Asko gustatu zait Nerea Loiola ren Zebrak eta bideak. Lana eta sena. Forma aldetik, proposamen desberdinak; mamiari dagokionez, begirada interesgarria. Bazterrekotzat jo litezkeenak, isildu izan direnak eta agerikoagoak (denongan daudenak. Hainbeste gu kabitzen dira guztiogan!)

Gustatu zait. Bere laburrean emakume migrante pobre baten begirada argia erakusten du, eguneroko gaitza eta zapalkuntzak zapalkuntza, bizitzan arnasteko arrakalak topatzen ditu.