Reviews and Comments

Asko harrapatu nau liburu honek. Neurri berean mindu eta hunkitu nau. Lesbianen eskubideetan urte gutxian eman den aldaketa ulertzeko oso baliagarria da. Bi garai ezberdinen artean saltoka kontatuta dago eta salto historiko horiek legedian, jendartean, familietan... lortu diren aldaketak ulertzeko tresna dira.

Ekonomia diruaren joan-etorriak baino askoz gehiago da, gutxi azaldu diguten arren. Ekonomiaren ulerkera zabaltzeko aukera eman dit lan honek eta baita praktikan ibilbide luzea egin duten Ekonomia Sozial Eraldatzaileko eta Ekonomia Sozialeko proiektu ekonomikoen oinarriak hobeto ulertzeko ere.

Liburu honek tresna gisa balio du proiektu ekonomiko berriak ikuspegi eraldatzaile batean lerratzeko edota martxan daudenak eraldatzeko.

Kapitalismoak gure muineraino sartu dizkigu lanaren inguruko adiera gaiztoak. Noski, lana zer den azaldu digutenean, lana zer ez den ere garbi utzi nahi izan digute. Hautsok ekarri dituzte lohiak.

Liburu honek gai honen inguruan hausnartu, lanaren kontzeptuari adiera berri bat eman eta bide berriak urratzeko aukera eman dit.

Oso erraz irakurtzeko ipuinak, gure eguneroko bizipenetatik gertu sentitu ditzakegunak. Modu ezberdinetan, baina protagonistek kabitu ezina sentitzen dute. Modu berean sentitu izan naizen uneekin konektatu eta egoera hauek berrirakurtzeko balio izan dit. Idazkera ederra!

Eremu digitalean noraeza hedatzen ari den garaiotan, mundu digitalerako iparrorratz gisa balio dezake liburu honek.

Soluzio zehatzak proposatu baino, eremu digitalean ematen diren dinamikak aztertzen dira, oinarrian dauden logikak azaltzen dira modu ulergarrian eta erabilera osasungarriagoak emateko pistak ematen dizkigute egileek.

Gustura irakurri dut, erraz. Tramaren sinpletasunak garraiatu nau, baina aldi berean faltan bota dut pertsonaien barne munduan sakontasun handiago bat.

Distopia bat topatuko nuela uste nuen hasieran, baina ondoren sinesgarriegiak iruditu zaizkit etorkizunean kokatutako egoerak eta gehiago erakarri naute beste aspektu batzuk, esaterako: non amaitzen da pertsonala eta non hasi politikoa; zer uzten dugu alde batera pertsonalki apostu politiko bat egitean; memoria historikoaren transmisioan zenbateraino gai transmisioa egiteko norberaren min sakonak gaindituz...