Kritikak eta Iruzkinak

Liburuaren liderrak beldurra eman dezake hasiera baten, baina behin hasita ezin izan dut irakurtzeari utzi. Varoufakisek troikaren aurkako borroka, David eta Goliaten artekoa, xehe-xehe aurkezten du, Europar Batasunaren barne inertzien krudeltasuna eta ezintasunak guztion argitara ekarriz.

Pixka bat tristea izan da liburu hau irakurtzea, "Greziar udaberriaren" bukaera tragikoa ezagututa; baina, idazlearen europazaketasunak bultzatuta (pixka bat naif nire ustez), tragedia hori Europa hobe baten aldeko borrokarako oihu bihurtzen du.

Komunista eta sozialistok askotan esaten dugu arazoa sistema dela, eta ez nor banakoak. Liburu honetan argitaratutako gertaerak horren adibide ederra dira. Varoufakisek dioen bezala, norbanakoen ekintzak ikusten ditu «through the lens of an authentic ancient Greek or Shakespearean tragedy in which characters, neither good nor bad, are overtaken by the unintended consequences of their conception of what they ought to do.»

Azken urteetako Euskal Herriko aldaketa politikoak ederki plazaratu ditu Salaberrik bere azken eleberrian. Emakume gazte baten begien bidez Baionako eta Ipar EHko giroa eta eraldaketa pertsonal zein politikoak oso modu pertsonalean eta ederrean aurkezten ditu, gure historia garaikidearen memoria ariketa baten bidez.

Liburu guztiz gomendagarria. Ez da egon izugarri gozatu ez dudan irakurketa unerik. Idazlearen beste liburua ("Baionak ez daki") irakurtzeko irrikitan geratu naiz!

Liburutegian aurkitu, eta askorik espero gabe hartu nuen liburua, eta azkenean asko gustatu zait. Lapurdiko inauterien erretratu pertsonala eskaintzen digu Castorenek, baina egiazki herriarekiko lotura eta komunitatearekiko engaiamendua dira kontakizunaren ardatz. Herriaren biziraupenaren eta bizitasunaren aldeko aldarrikapena, eguneroko iñurri lanean eta lanketa (itxuraz) txikietan oinarritua.

Bordatoren lehen liburua da hau, eta, nire ustez, esperientzia falta hori nabaritzen da batzuetan. Halere, oso liburu entretenigarria da, irakurterraza eta azkar irensteko modukoa. Haren liburu gehiagoren esperoan izango naiz, hobetzeko beta badu ere potentziala ikusten baitiot.

Oso liburu interesgarria, eta euskararen inguruko zenbait diskurtsu edo ideia faltsuri eta interesaturi aurka egiten die argiki. Halere, argumentu batzutan lastozko gizon ("strawman") baten aurka egiten duela iruditzen zait, euskara erasotzeko argumentario ez-hain-oldarkor batzuk lantzen ez baititu, eta aurkakotasun agerikoenean jartzen baitu arreta. Bestalde, idazlearen ideia edota irakurketa batzuekin muturra okertu dut irakurri hala, baina ondo dago gurekin %100ean bat ez datozen ikuspuntuak jasotzea.

Irakurketa guztiz gomendagarria, batez ere euskaldun gisa gure egoeraz eta zapalkuntzaz hausnartzeko.